တီတာတာ
ကညာမေဘုတ်က ၊ ရွှေနုတ်ချိုသွေး။
ကျူရိုးရှင်ပီပီနွဲ့၊ လွမ်းမယ်ဘွဲ့တေး။
ပဒေသာ
ထေရ်ဝါရည်စူးလို့၊ လှေဦးမှာလေး။
ကျူရိုးရှင် ပီပီနှော၊ စည်ဗြောသံတေး။
သောင်အခြေ
ခေါင်ရေလေမြူးတော့၊ ရေရူးတွေဖွေး။
ကျူရိုးရှင် ပီပီဟိန်း၊ ဗိန်းဗောင်းသံတေး။
အကောင်သေ
တောင်လေရေတက်တော့ ၊ ရေယက်နဲ့ထွေး။
ကျူရိုးရှင် ပီပီကြွေး၊ ငိုချင်းသံတေး။
တက်မကူ
ရွက်ဖြူပူပေါင်းနဲ့ ၊ လှေလောင်းကိုယ်လေး။
ကျူရိုးရှင် ပီပီပျိုး ၊ ဘွဲ့ကြိုးသံတေး။
ပြူတပြူ
မြေငူဓနိကျွန်း၊ သောင်ထွန်းပြီလေး။
ကျူရိုးရှင် ပီပီနော့၊ သားချော့သံတေး။
တေးမျိုးရယ်စုံ ၊ ကုန်နိုင်ပါလေဘဲ။
မဗေဒါစုန်ဆန်မြဲ ၊ တေးစုံနဲ့ဘဲ။ ။
ဇော်ဂျီ
(ရန်ကုန်တက္ကသိုလ် နှစ်လည်စာစောင်၊ ၁၉၅၇ – ၁၉၅၉)